ម្ដាយខ្ញុំ គឺជាមនុស្សម្នាក់ ដែលមិនសូវផ្ដល់សិទ្ធិសេរីភាពដល់កូននោះទេ មានពេលខ្លះ សូម្បីតែត្រូវធ្វើដំណើរទៅណាតែជិតៗសោះ ក៏ត្រូវសុំការអនុញ្ញាតពីគាត់ដែរ។ ឪពុកខ្ញុំបានស្លាប់ តាំងពីខ្ញុំមានអាយុ 3 ឆ្នាំម្ល៉េះ។ នៅពេលនេះ ខ្ញុំមានអាយុ 18 ឆ្នាំហើយ ម្ដាយខ្ញុំក៏ចាប់ផ្ដល់ចង់ឲ្យខ្ញុំមានគូស្រករ ព្រោះគាត់ចាស់ៗអស់ហើយ។
គាត់ចង់បានសម្រេចចិត្តឲ្យខ្ញុំរៀបការជាមួយនឹងបុរសម្នាក់ ដែលខ្ញុំមិនធ្លាប់ស្គាល់ទាល់តែសោះ តែគាត់ប្រាប់ថា គេជាកូនមិត្តភក្ដិគាត់។ បុរសម្នាក់នោះ មើលទៅគួរឲ្យស្អប់ខ្ពើមខ្លាំងណាស់ គ្រាន់តែទៅក្បែរគេ គឺធំក្លិនបារី និងមានពុកមាត់គួរឲ្យខ្លាចបំផុត។ ដូច្នេះហើយខ្ញុំព្យាយាមយ៉ាងដាច់ខាត ដើម្បីបដិសេធជាមួយនឹងម្ដាយខ្ញុំ ដោយមិនព្រមរៀបការជាមួយបុរសម្នាក់នោះជាដាច់ខាត។
ដោយសារសម្ដីប្រកែកតឹងសរសៃកខ្លាំង បានធ្វើឲ្យម្ដាយខ្ញុំខឹងយ៉ាងខ្លាំង ហើយគាត់ក៏បានទះខ្ញុំមួយដៃចំថ្ពាល់ខាងឆ្វេង។ មើលទៅមិនអាចប្រកែកបានទៀតទេ ខ្ញុំក៏យល់ព្រមតាមការបង្ខំរបស់គាត់។
នៅថ្ងៃទីមួយនៃយប់ផ្សំដំណេក ខ្ញុំបានយំនៅក្នុងបន្ទប់ ហើយបុរសម្នាក់បានដើរចូលមក និងសួរខ្ញុំថា "ហេតុអ្វីបានជាយំ"? ពេលនោះខ្ញុំឆ្លើយទាំងទឹកភ្នែកថា "ព្រោះខ្ញុំស្អប់លោក និងចង់រៀបការជាមួយលោកទេ, លោកស្អុយបារី និងមានពុកមាត់គួរឲ្យខ្លាច…"។ បុរសម្នាក់នោះបានតបមកថា "ហេតុអ្វីយល់ព្រមរៀបការ"?
ខ្ញុំបានឆ្លើយភ្លាមថា "ព្រោះម្ដាយខ្ញុំបង្ខំ"។ បុរសម្នាក់នោះបានឆ្លើយតបវិញថា "តាមពិតទៅខ្ញុំក៏មិនទាន់គិតថា ចង់រៀបការដែរ ព្រោះចង់រស់នៅម្នាក់ឯងជាង តែម្ដាយរបស់នាង បានមកអង្វរខ្ញុំ…"។
គាត់បានបន្តទៀតថា "ណ្ហើយចុះ! បើមិនពេញចិត្តខ្ញុំក៏មិនអីដែរ យើងរស់នៅជាមួយគ្នាដូចជាបងប្អូន ហើយមិនបាច់ធ្វើដូចជាប្ដីប្រពន្ធទេ"។
រំពេចនោះខ្ញុំក៏ឈប់យំ ហើយគាត់ក៏យកកន្ទេលទៅក្រាលលើឥដ្ឋការ៉ូ និងបានដេកលក់ទៅ។ ហើយខ្ញុំក៏ដេកលើគ្រែ។
ព្រឹកឡើងខ្ញុំបានឃើញបបរស និងពងទាចៀនជាស្រេចនៅលើតុ ហើយខ្ញុំដឹងថា គាត់ (បុរសម្នាក់នោះ) គឺជាអ្នកចម្អិន និងរៀបចំសម្រាប់ខ្ញុំ ហើយគាត់ក៏បានចេញទៅធ្វើការដែរ។ យើងរស់នៅបែបនេះ អស់រយៈពេល ១ខែ ទើបខ្ញុំដឹងថា គេជាមនុស្សម្នាក់ដែលគួរឲ្យគោរព និងស្រឡាញ់បំផុត។ គាត់មិនដែលធ្វើបាបចិត្តខ្ញុំសូម្បីតែម្ដងឡើយ។ ខ្ញុំបានប្រាប់ឲ្យគាត់ឲ្យមកគេងលើគ្រែជាមួយខ្ញុំ ហើយបានប្រាប់គាត់ថា "ខ្ញុំចង់រស់នៅជាមួយគ្នា ជាប្ដីប្រពន្ធវិញ"។
គាត់បានញញឹម និងឱបខ្ញុំ ហើយយើងក៏រស់នៅប្រកបដោយសុភមង្គលបំផុត។ ពេលនេះ ទើបខ្ញុំដឹងថា ទឹកចិត្តម្ដាយខ្ញុំធំធេងប៉ុណ្ណា ហើយខ្ញុំក៏ចង់ប្រាប់អ្នកទាំងអស់គ្នាថា កុំវាយតម្លៃមនុស្សម្នាក់ដោយសារតែរូបរាងខាងក្រៅ។
អានព័ត៌មានថ្មីៗថ្ងៃនេះ
ច្រណែនគ្រួសារគេរស់នៅមានក្តីសុខ មិនដែលឈ្លោះគ្នាក៏ទៅលបលួចមើល ទើបឃើញរឿងមួយធ្វើឲ្យភ្ញាក់ខ្លួន
មានគ្រួសារពីរ រស់នៅក្បែរគ្នាជាយូរមកហើយ ដោយគ្រួសារមួយតែងតែឈ្លោះគ្នាជាប្រចាំកម្រមានថ្ងៃណាផ្អែមល្ហែមជាមួយគ្នាណាស់ ឯគ្រួសារមួយទៀតរស់នៅបែបស្ងប់ស្ងាត់ និងមានសុភមង្គលមិនដែលឮសម្ដីតូចសម្ដីធំដាក់គ្នាទេ។
ថ្ងៃមួយ គ្រួសារឧស្សាហ៍បង្កជម្លោះ មានអារម្មណ៍ច្រណែននឹងបរិយាកាសក្នុងគ្រួសារស្ងប់ស្ងាត់ ដោយប្រពន្ធបានប្រាប់ប្ដីថា "សាកទៅលួចមើលគ្រួសារជាប់ផ្ទះយើងមើល៍ មូលហេតុអ្វីបានជាគ្រួសារគេនោះមិនដែលឮមាត់ឈ្លោះគ្នា ហើយរីករាយរហូតអីចឹង"?
ឮដូចនេះប្ដីបានធ្វើតាម ដោយនៅថ្ងៃបន្ទាប់គាត់លបចូលក្នុងផ្ទះពួនសម្ងំចាំមើល តើប្ដីប្រពន្ធមួយគូនេះធ្វើអ្វីខ្លះ? ទីបំផុតគាត់បានឃើញមែន គឺស្ត្រីម្នាក់កំពុងបោសជូតសម្អាតកម្រាលឥដ្ឋក្នុងបន្ទប់យ៉ាងស្ងៀមស្ងាត់។ រំពេចនោះ នាងបានឮសំឡេងអ្វីម្យ៉ាងនៅក្នុងផ្ទះបាយ រួចក៏រត់ទៅមើលភ្លាម។ ស្របពេលជាមួយគ្នានោះ គាត់បានឃើញប្ដីរបស់នាងដើរចូលបន្ទប់យ៉ាងប្រញាប់ ដោយមិនបានមើលធុងទឹកជូតឥដ្ឋ ក៏ច្រឡំដើរទាត់កំពប់ទឹកបាចសាចពេញបន្ទប់។
បន្ទាប់មក ស្ត្រីជាប្រពន្ធបានឮសំឡេងប្ដីទាត់ធុងទឹកក៏ប្រញាប់ដើរចេញពីផ្ទះបាយវិញ រួចនិយាយទៅកាន់ប្ដីថា " ខ្ញុំសុំទោស លោកប្ដី! វាជាកំហុសរបស់ខ្ញុំ ព្រោះខ្ញុំមិនបានយកធុងទឹកចេញពីផ្លូវដើរ រវល់តែទៅផ្ទះបាយបន្តិច។"
ប្ដីតបវិញថា៖"ទេទេ! បងសុំទោស ប្រពន្ធសម្លាញ់! វាជាកំហុសរបស់បងទៅវិញទេ ព្រោះបងដើរមិនបានចាប់អារម្មណ៍មិញនេះ។"
ចំណែកបុរសមកលួចមើល ឃើញរឿងរ៉ាវហើយបានត្រលប់ទៅផ្ទះវិញតាមបង្គាប់ប្រពន្ធ។ ពេលមកដល់ផ្ទះមិនបានអង្គុយស្រួលបួលបាត់ហត់ផងប្រពន្ធក៏សួរ៖ "តើបានដឹងមូលហេតុធ្វើឲ្យគ្រួសារមួយហ្នឹង រស់នៅមានសុភមង្គល ឬទេ?"
ប្ដីតប៖ "មិនបានឃើញអ្វីទាំងអស់ ឃើញតែប្ដីជាអ្នកដើរទាត់ធុងទឹក បែរជាប្រពន្ធមកសុំទោស ហើយប្ដីនោះក៏សុំទោសវិញដែរ។ ប្រពន្ធដឹងទេ បើរឿងតូចតាចនេះកើតឡើងចំពោះគ្រួសារយើងវិញ យើងទាំងពីរប្រាកដណាស់នឹងរកត្រូវរៀងៗខ្លួនមិនខាន ឯប្ដីប្រពន្ធគ្រួសារស្ងប់ស្ងាត់នោះបែរជាទទួលកំហុសរៀងៗខ្លួនទៅវិញ។" ប្រពន្ធឮបែបនេះ ភ្ញាក់ខ្លួនព្រើត និងសន្យាព្យាយាមធ្វើដូចគេចាប់ពីពេលនេះតទៅ៕
តម្លៃអប់រំ៖ រួមរស់ជាប្ដីប្រពន្ធក្នុងសង្គមមួយ ត្រូវចេះរៀនអធ្យាស្រ័យឲ្យគ្នាបើមានម្នាក់ធ្វើខុស។ អ្នកប្រព្រឹត្តខុសត្រូវចេះទទួលកំហុស និងមិនត្រូវធ្វើរឿងតូចឲ្យក្លាយជារឿងធំទេ។ សុភមង្គលគ្រួសារមិនមែនកើតឡើងឯកឯងទេ គឺប្ដីប្រពន្ធទាំងពីរជាអ្នកបង្កើតឲ្យមាន។
0 comments:
Post a Comment