បច្ចុប្បន្ននៅក្នុងខេត្តព្រះសីហនុ មានចំនួនជនជាតិបរទេសជាង៦ ពាន់នាក់ ហើយជនជាតិចិន មានចំនួនរហូតទៅដល់ជាង៤ពាន់នាក់។
កំណើនជនជាតិចិននេះ បានផ្តល់អត្ថប្រយោជន៍ជាច្រើននៅក្នុងជម្រុញការអភិវឌ្ឍក្នុងខេត្តជាប់មាត់សមុទ្រមួយនេះ ក៏ប៉ុន្តែជនជាតិមួយចំនួនបាន ប្រព្រឹត្តិបទល្មើស និងបង្កអសន្តិសុខ ដែលធ្វើឲ្យប្រជាពលរដ្ឋម្ចាស់ស្រុក និងភ្ញៀវទេសចរមួយចំនួន សម្តែងការមិនពេញចិត្ត។
ក្នុងចំណោមជនបរទេសទាំងអស់ចំនួន ៦ ៣៨៥ នាក់នៅខេត្តព្រះសីហនុ ជនជាតិចិនបានវ៉ាដាច់គេ ពោលគឺច្រើនដល់ទៅចំនួន ៤ ៤៩៨ នាក់ទៅហើយ។ បើតាមរបាយការណ៍របស់អភិបាលខេត្តព្រះសីហនុ។
របាយការណ៍ដដែល បន្ថែមទៀតថា ក្រៅពីជនជាតិចិនដែលមានចំនួនច្រើនដាច់គេនៅខេត្តព្រះសីហនុនោះ ជនជាតិដទៃទៀតដូចជា ឥណ្ឌូនេស៊ី ៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ ថៃ ៧២នាក់ រុស្ស៊ី ៧០នាក់ វៀតណាម ៦៧នាក់ បារាំង ៥៦នាក់ ឥណ្ឌា ៥២នាក់ ជនជាតិអង់គ្លេស ៥១នាក់ និងជនជាតិផ្សេងៗទៀត ៣៦១នាក់ ដែលពួកគេជាអ្នកទេសចរ អ្នកវិនិយោគ អ្នកបម្រើការកាស៊ីណូ កម្មករសំណង់ និងផ្សេងៗទៀត។
យ៉ាងណាមិញចំនួនជនជាតិចិនដ៏ច្រើនសម្បើមនេះ ក៏ផ្តល់ផលអវិជ្ជមានច្រើនដល់ខេត្តព្រះសីហនុ ដោយខ្លះលួចមករស់នៅនិងធ្វើការខុសច្បាប់ ខ្លះប្រព្រឹត្តិអំពើជំរិតអនឡាញ គ្រឿងញៀន និងបទល្មើសជាច្រើនផ្សេងទៀតគួរឲ្យបារម្ភ៕
0 comments:
Post a Comment