ព្រះអើយ! បុរសម្នាក់ហ៊ានប្រថុយជីវិតចុះទៅជួយលោកយាយម្នាក់ដែលធ្លាក់ចូលទន្លេដែលកករឹង ចុងក្រោយ…

ចិន៖

 បុរសម្នាក់ហ៊ានប្រថុយប្រថានជីវិតខ្លួនឯង ក្នុងបំណងជួញសង្គ្រោះស្ត្រីវ័យចំណាស់ម្នាក់ ដែលធ្លាក់ក្នុងទន្លេដែលកក នៅខេត្ត Hebei ប្រទេសចិន។ ប្រភពពុំបានបញ្ជាក់អំពីដើមហេតុនៃការរអិលធ្លាក់របស់លោកយាយនោះទេ។




បុរសក្លាហាន ជួយសង្គ្រោះស្ត្រីចំណាស់ ត្រូវគេស្គាល់ឈ្មោះថា Shi Lei វ័យ ៥៤ ឆ្នាំ រីឯស្ត្រីចំណាស់នោះ មានឈ្មោះ Zhai វ័យ ៧៣ ឆ្នាំ។
នៅព្រឹកកើតហេតុ លោក Shi បានជិះកង់ទៅធ្វើការដូចសព្វដង ស្រាប់តែប្រទះឃើញស្ត្រីចំណាស់ម្នាក់ កំពុងស្រវេស្រវ៉ារកឲ្យគេជួយនៅកណ្តាលផ្ទៃទន្លេដែលកក និងត្រជាក់យ៉ាងខ្លាំង ព្រោះសីតុណ្ហភាពនៅពេលនោះ ស្ថិតក្រោមសូន្យអង្សារឯណោះ។




ដោយមិនបង្អង់យូរ លោក Shi បានចុះពីលើកង់ រួចបានស្ទុះស្ទារអូសទាញគាត់ឲ្យចេញពីផ្ទៃទន្លេក្នុងស្ថានភាពយ៉ាងលំបាកយ៉ាប់យុឺន ដោយសារមានការរាំងស្ទះពីផ្ទាំងទឹកកក ដែលកកជាប់ក្នុងទន្លេ ណាមួយលោកយាយមានទម្ងន់ធ្ងន់ ព្រោះខោអាវរបស់គាត់បានជក់ទឹកបាត់ទៅហើយ។
យ៉ាងណាក៏ដោយ លោក Shi បានប្រើប្រាស់ត្រឹមដៃរបស់លោកផ្ទាល់ ជាមធ្យោបាយវាយកម្ទេចផ្ទាំងទឹកកក ដែលត្រូវបានគេមើលឃើញថា មានលក្ខណៈស្តើងអាចវាយបំបែកបាន។ លោក Shi បានទទួលជំនួយពីបុរសម្នាក់ទៀត មានឈ្មោះថា Ma Hongjie ជាអ្នកដំណើរឆ្លងកាត់ទីនោះដែរ។




ទីបំផុតពួកគេទាំងពីរ បានជួយសង្គ្រោះស្ត្រីចំណាស់វ័យ ៧៣ ឆ្នាំខាងលើ បានជោគជ័យ​ ហើយសកម្មភាពរបស់ពួកគេ ត្រូវបានថតជាប់ និងបង្ហោះចែកចាយ​តៗ​គ្នាលើបណ្តាញអុីនធឺណេត។



អ្នកនិយមលេងអុីនធឺណេតជាច្រើន បានកោតសរសើរចំពោះសេចក្តីក្លាហានរបស់លោក Shi ដែលជាមនុស្សមានស្មារតី ចេះជួយអ្នកដទៃក្នុងគ្រាមានអាសន្ន។ រីឯអ្នកខ្លះវិញ បែរ​ជាធ្វើការរិះគន់ទៅលើអ្នកថតបង្ហោះវីដេអូទៅវិញ ដោយចោទថាម្តេចក៏មិនទម្លាក់កាមេរ៉ាចុះ ហើយចូលរួមជួយនឹងគេ៕
សូមទស្សនាវីដេអូខាងក្រោម៖