ខេត្តក្រចេះ ៖ បុរសម្នាក់យល់សប្តិច្បាស់ដូចថ្ងៃថា មានគេមកប្រាប់ថា ទៅជីកយកវត្ថុបុរាណ ស្រាប់តែរូបគាត់ទៅក៏ប្រទះឃើញកប់ក្រោមគល់ឈើមួយនៅខាងក្រោយផ្ទះ ពិតប្រាកដមែន ដោយរូបស្ពាន់ឃ្លោក១ និងគីង្គគ់ចំនួន២ ដែលមានក្បូរក្បាច់រចនាបថបែបចិន ប៉ុន្តែតាមការពិតវត្ថុទាំងនោះមិនមែនជាវត្ថុបុរាណឡើយ ។
បុរសដែលដើរប្រាប់អ្នកភូមិ និងអាជ្ញាធរថា រូបគាត់ជាអ្នករកឃើញវត្ថុបុរាណឃ្លោក និងរូបគីង្គក់នោះ មានឈ្មោះ ញិះ អឿន ហៅជាតិ អាយុ៥១ឆ្នាំ រស់នៅចំណុចត្រពាំងត្រាំង ក្នុងភូមិកសាង ឃុំចង្ក្រង់ ស្រុកចិត្របុរី ខេត្តក្រចេះ ។
បុរសខាងលើ បានយកមកបង្ហាញអ្នកនៅក្នុងភូមិក៏ដូចជាអាជ្ញាធរ ដោយប្រាប់ថា រូបគាត់បានរកឃើញវត្ថុបុរាណ ក្រោយពេលដែលគាត់ដេកយល់សប្តិថា មានគេប្រាប់ឲ្យទៅជីកដីគល់ឈើនៅខាងក្រោយផ្ទះ រូបគាត់ក៏ទៅជីកតាមការយល់សប្តិទាំងយប់ ហើយបានឃើញវត្ថុបុរាណទាំង៣នេះពិតប្រាកដមែន ក្នុងនោះមានឃ្លោកចំនួន១ និងគីង្គគ់ចំនួន២ មានពណ៌ដូចស្ពាន់ ។
ជាមួយនឹងការអះអាងពីការប្រទះឃើញវត្ថុបុរាណចិននេះ អ្នកភូមិក៏ដូចជាអាជ្ញាធរ នៅឃុំចង្ក្រង់ ស្រុកចិត្របុរី ហាក់មិនចាប់អារម្មណ៍ទេ ដោយអ្នកភូមិចាត់ទុកថា នេះការភូតកុហក បោកប្រាស់របស់បុរសនៅក្នុងភូមិរូបនេះតែប៉ុណ្ណោះ ព្រោះវត្ថុទាំងនោះមិនមែនជាវត្ថុបុរាណពិតឡើយ ។
បើតាមការរៀបរាប់របស់មន្ត្រីនគរបាលប៉ុស្តិ៍រដ្ឋបាលចង្ក្រង់ បានឲ្យដឹងថា ប្រហែលជាបុរសរូបនេះចាញ់បោកគេ រឿងទិញលក់វត្ថុបុរាណចិន ហើយក៏បានយកវត្ថុទាំងនេះ ធ្វើជាវត្ថុបុរាណពិតដើម្បីលក់បន្ត ។ មួយវិញទៀត លោកគិតថា បុរស រូបនេះ អាចទៅទិញរបស់ទាំងនេះពីកន្លែងណាមួយ ហើយបានយកមកធ្វើរូបភាពជារកឃើញ តាមការយល់សប្តិជាវត្ថុបុរាណ ដើម្បីលក់បន្តក្នុងតម្លៃថ្លៃណាមួយ នាឱកាសបុណ្យចូលឆ្នាំប្រពៃណីជនជាតិចិន ខាងមុខនេះ ។
បន្ទាប់ពីមានការនិយាយតៗគ្នា ខាងមន្ទីរវប្បធម៌ក៏បានចាត់មន្ត្រីរបស់ខ្លួន អោយចុះមកមើលវត្ថុទាំងនេះ កាលពីថ្ងៃទី២ កុម្ភៈ ២០១៨ ចុងសប្តាហ៍កន្លងមកនេះ ដោយមន្ត្រីនៃមន្ទីរវប្បធម៌បានវាយតម្លៃថា វត្ថុទាំង៣នេះ មិនមែនជាវត្ថុបុរាណដូចតាមការលើកឡើងរបស់បុរសខាងលើនោះទេ ព្រោះសំអាងលើហេតុផលច្រើន មានដូចជាវត្ថុនោះនៅថ្មីមានពណ៌ភ្លឺរលោងនៅឡើយ ហើយរណ្តៅទៀតសោតក៏រាងរាក់ដូចទើបកាយថ្មីៗ ជាដើម។ល។ តែប្រសិនបើមន្ត្រីជំនាញពិនិត្យមើលទៅឃើញថា របស់នោះជារបស់វត្ថុបុរាណពិតមែន គឺខាងអាជ្ញាធរ នឹងជាវក្នុងតម្លៃណាមួយ ដើម្បីយកទៅរក្សាទុក ។
ក្រឡេកមកមើលរបស់របរជាច្រើន មានទាំងវត្ថុមានក្បូរក្បាច់រចនាបែបចិន ត្រូវបានគេហទំព័រ aliexpress របស់ចិនមួយ បានដាក់លក់តាមអ៊ីនធើណេត ដែលក្នុងនោះគេឃើញមាន រូបគីង្គគ់ស្ពាន់ លក់ក្នុងតម្លៃ ៤៦ដុល្លារ (គឺដូចគ្នាទៅនឹងរូបស្ពាន់របស់បុរសខាងលើដែរ) និងរូបឃ្លោកស្ពាន់ លក់ក្នុងតម្លៃ ១៩៧ដុល្លារសហរដ្ឋអាមេរិក ៕
0 comments:
Post a Comment