ឥណ្ឌានឹងក្លាយជាមហាអំណាចសេដ្ឋកិច្ច លំដាប់ទី៥ នៅលើពិភពលោក នៅឆ្នាំ២០១៨នេះ វ៉ាឈ្នះបារាំងនិងអង់គ្លេស ទាំងពីរប្រទេស ក្នុងពេលតែមួយតែម្តង។ នេះបើតាមរបាយការណ៍អង់គ្លេសនៃមជ្ឈមណ្ឌល Economics and Business Research (CEBR) ចេញផ្សាយនៅថ្ងៃព្រហស្បតិ៍ម្សិលមិញ។ គ្រប់គ្នារង់ចាំដំណឹងនេះយូរមកហើយ ព្រោះឥណ្ឌាមានកំណើនសេដ្ឋកិច្ចខ្លាំងនិងថេរតាំងពីជាងមួយទសវត្សរ៍ ប៉ុន្តែឥណ្ឌានៅប្រឈមខ្លាំងនឹងបញ្ហាគម្លាតសង្គម។
ជាប់ចំណាត់លេខ៧នៅថ្ងៃនេះ តែនៅឆ្នាំក្រោយ ២០១៨ ឥណ្ឌានឹងដណ្តើមយកនាមជាមហាអំណាចសេដ្ឋកិច្ចពិភពលោក លំដាប់ទី៥ និងលេខ៣ នៅឆ្នាំ២០៣២។ មានន័យថា ឥណ្ឌាកំពុងបោះជំហានវ៉ាឈ្នះបារាំងនិងពិសេសអង់គ្លេស ក្នុងពេលតែមួយឆ្នាំ។ អ្នកដឹកនាំប្រទេសពិតជាមានមោទនភាពខ្លាំងណាស់ដែលឥណ្ឌាអាចដណ្តើមចំណាត់ថ្នាក់ ជានិម្មត្តរូបបានពីមហាអំណាចជាអតីតប្រទេសអាណានិគមលើឥណ្ឌា។
ថ្មីៗនេះ ប្រទេសឥណ្ឌា បានបាញ់បង្ហោះផ្កាយរណបតូចៗចំនួន ៣១គ្រឿងតាមរយៈគ្រាប់រ៉ុកកែត PSLV-C40 ទៅកាន់ទីអវកាសនៅថ្ងៃទី១២ ខែមករានេះ ដើម្បីធ្វើឲ្យល្អប្រសើរឡើងនូវការឃ្លាំមើលព្រំដែន និងទទួលបានរូបភាពកាន់តែច្បាស់របស់ភពផែនដី។អង្គការស្រាវជ្រាវអវកាសឥណ្ឌា (ISRO) បានបាញ់បង្ហោះផ្កាយរណបទាំងនេះចេញពីមជ្ឈមណ្ឌលអវកាស Satish Dhawan ក្នុងតំបន់ Sriharikota នៅភាគខាងត្បូងរដ្ឋ Andhra Pradesh។
សូមបញ្ជាក់ថា ក្នុងចំណោមផ្កាយរណបទាំង៣១គ្រឿង ក្នុងនោះគឺមានតែ១គ្រឿងប៉ុណ្ណោះដែលជារបស់ឥណ្ឌា និងជាផ្កាយរណបទី១០០ របស់ប្រទេសនេះ មានឈ្មោះថា Cartosat-2 Series។ ចំណែកផ្កាយរណប៣០គ្រឿងទៀតដែលត្រូវបានបាញ់បង្ហោះទៅកាន់គន្លងផែនដីជាមួយគ្នានោះ គឺជារបស់ប្រទេសចំនួន៦ រួមមាន អាមេរិក បារាំង ហ្វាំងឡង់ អង់គ្លេស កូរ៉េខាងត្បូង និងកាណាដា។
គួរបញ្ជាក់ដែរថាបើតាម លោក Douglas McWilliams នាយករងប្រតិបត្តិនៃមជ្ឈមណ្ឌលខាងលើ បាននិយាយថា "ទោះបីជាពេលនេះសេដ្ឋកិច្ចឥណ្ឌាហាក់កើនយឺត ប៉ុន្តែប្រទេសនេះនឹងអាចយកឈ្នះប្រទេសធំ២ គឺចក្រភពអង់គ្លេស និងបារាំង នៅឆ្នាំក្រោយនេះ ដើម្បីក្លាយខ្លួនជាប្រទេសមហាអំណាចសេដ្ឋកិច្ចទី៥ក្នុងលោក បើគិតលើទំហំសេដ្ឋកិច្ចជាដុល្លារអាមេរិក"។មជ្ឈមណ្ឌលសេដ្ឋកិច្ចដដែល ក៏បានអះអាងដែរថា ត្រឹមរយៈពេល ១៥ឆ្នាំខាងមុខ តារាងនៃប្រទេសសេដ្ឋកិច្ចកំពូលទាំង ១០ នឹងពោរពេញទៅដោយប្រទេសនៅអាស៊ី។ ប្រភពដដែល ក៏បានលើកឡើងដែរថា ចិន នឹងអាចវ៉ាសហរដ្ឋអាមេរិក ក្លាយទៅជាប្រទេសមហាអំណាចសេដ្ឋកិច្ចទី១ នៅក្នុងឆ្នាំ២០៣២ ផងដែរ ចំណែករុស្ស៊ី នឹងធ្លាក់ទៅចំណាត់ថ្នាក់ទី ១៧ ក្នុងឆ្នាំដដែលនោះ។
0 comments:
Post a Comment