សំណាងមែនពីរថ្ងៃទៀតដល់ថ្ងៃហួសកំណត់ក៏ឆែកមើលហោប៉ាវអាវចាស់ឈប់ស្លៀកមួយស្រាប់តែឈ្នះរង្វាន់ដល់ទៅ

អាមេរិក៖

 រឿងរ៉ាវគួរឲ្យត្រេកអរ និងនឹកស្មានមិនដល់មួយបានកើតឡើងចំពោះបុរសវ័យចំណាស់សញ្ជាតិអាមេរិកម្នាក់ ដែលលោកទទួលបានប្រាក់រង្វាន់ប្រមាណ ២៤លានដុល្លារ ក្រោយពេលឃើញសន្លឹកឆ្នោតរង្វាន់នៅក្នុងហោប៉ាវអាវចាស់មួយ ដែលលោកខានបានពាក់វាជិតមួយឆ្នាំទៅហើយ។




គួរបញ្ជាក់ថា កាលពីឆ្នាំទៅ លោក Jimmie Smith វ័យ ៦៨ ឆ្នាំ បានជាវសន្លឹកឆ្នោតផ្សងសំណាងមួយសន្លឹក ពីក្រុមហ៊ុនឆ្នោតអាមេរិកដ៏ល្បីឈ្មោះមួយ ដែលគេស្គាល់ថា New York Lottery។ ជាក់ស្តែងនាថ្ងៃទី២៥ ខែឧសភា ឆ្នាំ២០១៦ ក្រុមហ៊ុនឆ្នោតផ្សងសំណាងមួយនេះ បានប្រកាសលេខដែលត្រូវរង្វាន់ ដែលមានលេខ 05 – 12 – 13 – 22 – 25 – 35។
តាមលក្ខខន្តិកៈ សន្លឹកឆ្នោតផ្សងសំណាងគឺមានសុពលភាពត្រឹមរយៈមួយឆ្នាំតែប៉ុណ្ណោះ ដែលមានន័យថាសន្លឹកឆ្នោតណាដែលយកមកប្តូរហួសថ្ងៃកំណត់ នឹងក្លាយជាអាសារបង់។

រយៈពេលជាច្រើនខែដែលមិនទាន់រកឃើញម្ចាស់ឆ្នោត ក្រុមហ៊ុន New York Lottery បានសម្រេចចិត្តប្រកាសដាស់តឿន ឲ្យអ្នកទិញសន្លឹកឆ្នោតទាំងអស់មេត្តាជួយឆែកហោប៉ៅរបស់ខ្លួន មើលក្រោមពូក ឫសាឡុង ក្រែងបានត្រូវរង្វាន់។




នៅសុខមិនសុខ លោក Smith ដែលត្រូវជាបុគ្គលិកសន្តិសុខចូលនិវត្តន៍ បានតាមដានឃើញព័ត៌មាន អំពីការប្រកាសស្វែងរកម្ចាស់សន្លឹកឆ្នោតរង្វាន់។ ភ្លាមៗនោះលោកក៏មានចិត្តចង់ឆែកហោប៉ាអាវចាស់ៗដែលលោកខានពាក់ ក្រែងលមានភ័ព្វសំណាងក្លាយជាសេដ្ឋីដូចគេដូចឯង។ មួយរំពេចនោះ លោកក៏ប្រទេះឃើញសន្លឹកឆ្នោតដែលខ្ទក់ក្នុងហោប៉ាវអាវចាស់មួយ។
ពេលឃើញលេខដែលមានក្នុងសន្លឹកឆ្នោតនោះ មើលទៅដូចជាប្រហាក់ប្រហែលនឹងលេខឆ្នោតសំណាង ដែលត្រូវបានគេប្រកាស លោកស្រាប់តែភ្ញាក់ខ្លួនព្រឺតតែម្តង។ បុរសចំណាស់រូបនេះឈរទ្រឹងសម្លឹងទៅក្រៅបង្អួច រួចសួរខ្លួនឯង តើលោកកំពុងស្រមៃ ឬយ៉ាងណា តើសន្លឹកឆ្នោតនេះជាអ្វីតែគេកំពុងតែស្វែងរកមែនឬ?

គួរឲ្យដឹងថា ក្រុមហ៊ុនឆ្នោតបានយល់ព្រមធ្វើការបើករង្វាន់ឲ្យលោក Smith ព្រោះលោកបានយកវាទៅប្តូរបានទាន់ពេលវេលា ពោលគឺពីរថ្ងៃមុនថ្ងៃផុតកំណត់ ហើយប្រសិនបើលោកមកយឺតត្រឹមរយៈតែពីរថ្ងៃដែលបានបញ្ជាក់យ៉ាងដូច្នេះ លោកច្បាស់នឹងកើតទុក្ខសោកស្តាយឱកាសក្លាយជាសេដ្ឋីមួយនេះជាក់ជាពុំខាន៕